A Bùssolèngo, Véróna, ‘nàuguràda la “Fèsta déla trìpa e dei piàti déla mèio tràdissión vérónése”. Prémiàdi i prìmi trì clàssifìcàdi dei cóncorsi “La trìpa pì bòna de San Valéntìn” e “La trìpa révisità de San Vàléntìn”. ‘Na màravéia de trìpe…!
A Bussolèngo, el 6 de fébràr 2025, l’è sta ‘nàugurà ‘l ‘ncóntro, par cùzì dìr, più gùstóso e straórdenàrio de l’àno, che l’è la “Fèsta déla Trìpa e dei Piàti più ‘npòrtànti de la tràdissión véronése”. I-a vèrto la 10ª édissión del Trófèo “La Trìpa pì bòna de San Valentìn”, che la çèlebra la tradissión, ‘n cùzìna, prémiàndo la mèio riçéta de la trìpa, e ‘l Trófèo “La Trìpa révìsità de San Vàléntìn”, idéà, par vàlórizàr le ‘ntérprétassióni più ‘nóvative. La Giùrìa, guìdàda, da Giùlio Móntresòr, prófessór Chéf de Enaip Veneto, Isola déla Scàla, Verona, e cònpósta, da Dàvide Fiòrio, Andrèa Vénturìni, Clàudio Gàsparìni, Pàola Mìgliorànza e Chiàra Vicéntìni, l’a décrétà vénçìdóri: par el cóncòrso “La trìpa pì bòna de San Valéntìn”: al prìmo pòsto, Giòrgio Accórdìni, al sécóndo pòsto, Maçèlarìa Còrdiòli, e, al tèrço pòsto, ‘l Réstóìrante La Cascina. Par “La trìpa révisità de San Valéntìn”: prìmo clàssìficàdo: La Cascina, sécóndo classìficàdo, l’Óstarìa El Borgo, e, tèrso clàssificàdo, Flover. La vàlutassión l’a tégnù cónto del’aspèto, del gùsto, dél réspèto déla tràdissión e de l’àbinaménto enològico, ó sìa, c’ò i vìni… El vénçédór del cóncórso “La trìpa pì bòna de San Vàléntìn” l’a réçevù, cóme prèmio, óltre a un piàto artigianàl, décoràdo, ànca ‘n piàto de brónzo, cónférmànte la vìtòria al Trófèo. ‘L vénçédór del cóncó’rso “La trìpa révizìtà de San Vàléntìn” – i ghé dìze ‘trìpa ‘nóvatiìva –, l’g’a ‘vù, ‘nvéçe, ‘na tàrga atéstànte la vìtòria del Trfeo 1ª édissión 2025. I sécóndi e tèrsi clàsificàdi i-a réçévù, ‘na tàrga. Ài àltri pàrtéçipànti gh’è sta dàdo ‘n àtéstàdo. Prézénti al gran èvènto i-éra ànca Idro Neri, giórnalìsta, che da 28 àni, ‘l sé dèdica al tèma “trìpa”, e l’artista Danièla Gùgòle, che, st’àno, l’a ideà e créà ‘l nóvo Tróféo, par ‘l prìmo clàssificàdo del cóncórso “La trìpa pì bòna de San Vàléntìn”. ‘N sóstànsa, s’a tràta de ‘na bèla manifestàssion, che, pàràltro, la cóntinua ‘ncóra, nel più grande quàdro déla 314ª Fiera de San Vàléntìn, che la scómìnsia, el 13 de fébràr, par duràr, fìn al 17, có’ ’na mòta de própòste e de ófèrte ènogàstrónòmiche – cùzì i dìze, al giórno de ancó – trìpe cónprése… Tùto questo, ‘l mé fa végnér ‘n ménte, quando, da zóeno stàva, a Verona, ‘n via Sótórìva, nùmaro 26, dàvanti a l’óstaria del càntón, quando gh’éra, néla zòna, divèrse óstarìe, che le pórtàva la scrìta “Trìpe prónte”: sé tràtàva de ménèstra de trìpe – più bródo, che trìpe – o de ‘n bèl piàto de trìpe, da gustàr, có’ bòni bicéri… Bèi tempi, che le trìpe de Bùssólèngo – ghé n’avémo gustà de divèrsi tipi, có’ sàóri stràórdenàri – le né fa récórdàr, al pùnto che a Bùssolèngo, g’ó ‘n ménte de ‘ndàrghe ‘n’antra vòlta…, pròpio, par le trìpe…! Cónpliménti àle Sióre e ai Sióri del Cómùne de Bùssólèngo e ai sióri Vólóntàri, mài stùfi de làóràr, par ‘l bèn dei altri…!
Pierantonio Braggio
Home 
